መግቢያ

 

ከሦስት ሺህ ዓመታት በፊት ብንጀምርስ ብለን ተነሳን፤

የካህኑ ሶዶቅን ምክር አስታከን።

ትዝታና ታሪክ ወደ ኋላ ባይመልስም ጊዜን፥

እናስተውል ዛሬ ለኢትዮጵያችን የሚሻላትን፤

ለሁላችንም የሚበጀንን።

 

የሶዶቅ ምክር

 

ካህኑ ሶዶቅ እና ነቢዩ ናታን ሰሎሞንን ቀብተው እንዳነገሡት፤

ለቀዳማዊ ሚኒሊክም (የማክዳና የሰሎሞን ልጅ) እንዲሁ ተደረገለት።

ያኔ (ከሦስት ሺህ ዓመታት በፊት)፥

እንዲህ እያለ ነበረ ሶዶቅ ለቀዳማዊ ሚኒሊክ በየቀኑ የሚመክረው2፦-

“ልጄ ሆይ፦

ኑሮህ በእግዚአብሔር እምነት የፀና ይሁን፤

ሥራህ ሁሉ ስኬታማ እንዲሆን።

አንተ ጥሩ ስትሆን፥ ሕዝቡም አንተን ተከትሎ ጥሩ ይሆናል፤

ባንተ ሳቢያ ሕዝቡም አገሩም ይባረካል።

ድሆችን ከሚጨቁኗቸው - ከግፈኞች ነፃ አውጣቸው፤

በቀናውም መንገድ ምራቸው፤

በእኩልነት ተመልከታቸው።

ዳኝነትህም አድሎኣዊ እንዳይሆን ተጠንቀቅ፤

በሕግ ፊት - ማንም ከማንም እንዳይበልጥ እወቅ።”